XIV Certame de Regueifas Escolar do Concello de Vigo

O pasado mércores 26 de marzo de 2025 celebrouse a XIV edición do Certame de Regueifas Escolar do Concello de Vigo no auditorio do Centro Veciñal e Cultural de Valladares.
Cerca de 500 alumnos de ensinanza secundaria de 11 centros de Vigo participaron neste evento no que de novo o IES Santo Tomé foi o que conseguiu un maior número de regueifeiros na final. O segundo clasificado foi o IES Castealo, deixando en terceiro lugar ao IES Alexandre Bóveda.
O alumnado accedeu en 10 grupos de 12 ou 13 compoñentes ó escenario, onde tiñan que pasar tres probas de improvisación en verso (copla de presentación, verso rimado con inclusión de dúas palabras dadas, estrofa cun verso dado de arranque). De cada grupo escolmáronse @s dous mozos/as con maior puntuación da suma outorgada polo xurado, ate xuntar ós/as 20 finalistas. Este ano, ó igual que nos sete últimos, houbo unha ronda adicional, da que sairon os catro primeiros, que en tres minutos tiveron que entrelazar catro estrofas improvisadas no momento, coas palabras e versos, que aportaron os mestres de cerimonia Luís “O Caruncho” e Pinto D´Herbón. O ambiente na platea foi espectacular, con siareiros apoiando ós/ás escolmad@s dos respectivos colexios con pancartas e outros artefactos sonoros e animación e diversión a esgalla, aplaudindo a tódolos improvisadores sen distinción.
Nos próximos meses programaranse máis obradoiros de balde para a mocidade, polo que animamos @s s interesad@s a que se apunten no correo-e da asociación oral@regueifa.org e acudan ás clases gratuitas que promove o Concello no Centro de Interpretación da Oralidade de Vigo, que está radicado nun aula do Museo Verbum e que van de setembro a maio/xuño.